മടുപ്പ്

ഒഴുകിയൊഴുകി മടുത്തിട്ടാവണം
പുഴ കുപ്പിയിലായത്..

തിരമാലകളടിച്ചു മടുത്തിട്ടാവണം
കടലൊരു സുനാമിയായത്..

മൊട്ടിട്ടും വിരിഞ്ഞും മടുത്തിട്ടാവണം
പൂക്കള്‍ ഷോകേസില്‍ കയറിയത്..

വെട്ടിയും നുറുങ്ങിയും മടുത്തിട്ടാവണം
മരങ്ങള്‍ കടല്‍ കടന്നു പോയത്..

മാന്തിപ്പൊളിച്ചു മടുത്തിട്ടാവണം
കുന്നുകള്‍ അലിഞ്ഞലിഞ്ഞില്ലാതായത്..

ഓടിയോടി മടുത്തിട്ടാവണം റോഡിലെ
കുഴികള്‍ കോണ്ട്രാക്ടറുടെ പോക്കറ്റിലായത്..

എഴുതിയെഴുതി മടുത്തിട്ടാവണം
അക്ഷരങ്ങള്‍ ബ്ലോഗിലേക്ക് കുടിയേറിയത്..

ഇനിയും മടുക്കുവാനും മാറിപ്പാര്‍ക്കുവാനും
കൊതിക്കുന്നവരുടെ ഇടയിലേക്ക് ഞാനും...